Dómur Hæstaréttar um myntkörfulánin getur haft víðtæk áhrif um allt samfélagið, en í dómnum er komist að þeirri niðurstöðu að lög um vexti og verðbætur frá árinu 2001 feli í sér bann við að lán séu verðtryggð með tengingu við gengi krónunnar.

Það eru ekki bara heimilin sem hafa tekið þessi lán; fyrirtæki, verktakar, smábátasjómenn, bændur og sveitarfélög hafa tekið myntkörfulán.

Ef dómurinn verður túlkaður þannig að öll lán þar sem ekki var afhentur gjaldeyrir séu ólögleg verða áhrif hans mjög víðtæk. Samkvæmt tölum Seðlabankans námu gengisbundin lán heimila, fyrirtækja og annarra 885 milljörðum um síðustu áramót.

Eyvindur G. Gunnarsson, lektor við lagadeild HÍ, bendir á að staða þeirra sem tóku myntkörfulán sé núna orðin mun betri en þeirra sem tóku verðtryggð lán í krónum.