Afdráttarlausar og skýrar kröfur

„Það er gríðarlega mikil áhersla lögð á atvinnumálin og kaupmáttinn,“ segir Kristján Gunnarsson, formaður Starfsgreinasambandsins (SGS) en framkvæmdastjórn þess fundaði í dag um undirbúning kjaraviðræðna í haust. „Fólk vill sjá launin hækka. Það eru afdráttarlausar og skýrar kröfur um það.“

Framkvæmdastjórnin fer með æðsta vald í málefnum Starfsgreinasambandsins á milli þinga. Forystumenn verkalýðsfélaganna í SGS undirbjuggu m.a. viðræðuáætlanir á fundinum í dag, sem gerðar verða við viðsemjendurna, atvinnurekendur og hið opinbera, en sú einstaka staða er uppi að öll launþegafélög og sambönd verða með lausa samninga í lok ársins.

„Þetta var fyrst og fremst undirbúnings- og skipulagsvinna en að sjálfsögðu hafa menn komið að áherslum sínum um stöðuna. Menn skynja það mjög vel í baklandinu hverjar áherslur fólksins eru,“ segir Kristján.

Sum aðildarfélög SGS eru þessa dagana að láta vinna viðhorfskannanir meðal félagsmanna sem lagðar verða til grundvallar kröfugerð félaganna í haust. 

• 4 blogg um fréttina

Bloggað um fréttina

• Axel Jóhann Hallgrímsson: Sendum Kristján Gunnarsson í endurmenntun, gerum hann atvinnulausan.
• Ægir Óskar Hallgrímsson: Andskotans aumingjar??
• Sigrún Jónsdóttir: Laun hækki um 70%
• Jón Pétur Líndal: Vantar að ná í ránsfenginn svo hægt sé að greiða …