Borgarráð hefur samþykkt að afhenda Kvennaskólanum húsnæði Miðbæjarskólans til umráða frá og með 1. febrúar á næsta ári. Ef allt gengur að óskum ætti því starfsemi Kvennaskólans að geta hafist í skólanum haustið 2011. Starfsemi Reykjavíkurborgar í húsinu flyst í húsnæði borgarinnar við Höfðatorg.
Borgarráð hefur samþykkt yfirlýsingu um áframhaldandi samstarf ríkis og borgar í húsnæðismálum reykvískra framhaldsskóla til ársins 2014.
Í fréttatilkynningu kemur fram að borg og ríki hafi verið í samstarfi um uppbyggingu framhaldskólanna í borginni allt frá árinu 2003 til ársins 2010. Nú hefur borgarráð samþykkt að framlengja samkomulagið til ársins 2014.
„Framlengingin felur ekki aðeins í sér afnot Kvennaskólans af Miðbæjarskólanum því lokið verður við framkvæmdir á húsnæði Fjölbrautarskólans í Ármúla og hafist handa við úrbætur á húsnæði Menntaskólans við Sund á samningstímanum," segir í fréttatilkynningu.
Jón Gnarr, borgarstjóri, lýsti yfir ánægju sinni með framlengingu samningsins. „Með honum leggur Reykjavíkurborg sitt að mörkum til uppbyggingar framhaldsskólanna og þess að starfsemi Kvennaskólans verði áfram í miðborginni. Ungt fólk gerir miðborgina líflegri og skemmtilegri,“ segir ennfremur í fréttatilkynningu.