Aldrei fleiri brautskráðir

Alls brautskráðust 5.689 nemendur af framhaldsskólastigi með 6.404 próf skólaárið 2008-2009. Þetta er fjölgun um 150 nemendur frá fyrra ári, eða 2,7%. Aldrei áður hafa svo margir nemendur útskrifast af framhaldsskólastigi á einu skólaári síðan gagnasöfnun Hagstofu Íslands hófst árið 1995.

Ástæðan er meðal annars sú að stórir árgangar eru að fara í gegnum framhaldsskólann. Stúlkur voru nokkru fleiri en piltar meðal brautskráðra eða 52,9% nemenda, sem er nokkru lægra hlutfall en síðustu tvö ár.

Í fyrsta skipti brautskráðust fleiri en 3.000 stúdentar á einu skólaári

Alls útskrifuðust 3.012 stúdentar úr 33 skólum skólaárið 2008-2009; 204 fleiri en skólaárið áður (7,3% fjölgun) og 457 fleiri en fyrir tveimur árum. Þar munar mestu um tæplega þriðjungsfjölgun brautskráninga úr frumgreinadeildum og viðbótarnámi til stúdentsprófs að loknu list- eða starfsnámi, sem voru alls 601 á skólaárinu. Tveir af hverjum þremur nýstúdentum (66,4%) eru á aldrinum 20-21 árs. Flestir brautskráðust af félagsfræðabraut, 979 talsins, og 944 luku náttúrufræðibraut.

Aldrei áður jafn margir útskrifaðir úr starfsnámi

Brautskráningar úr starfsnámi og almennri braut á framhaldsskólastigi voru 3.366 og hafa ekki verið fleiri á einu skólaári. Brautskráðir nemendur með sveinspróf voru 736 og fjölgaði um 58 frá fyrra ári (8,6%). Karlar eru tæplega 85% þeirra sem ljúka sveinsprófi og eru sveinar flestir í aldursflokknum 25-29 ára. Þá voru 1.555 brautskráningar úr öðru starfsnámi og 313 með grunnpróf, til dæmis grunnpróf í iðn eða almenna braut framhaldsskóla. Brautskráðir iðnmeistarar voru 195 og hafa ekki áður verið fleiri í gagnasöfnun Hagstofunnar.

Fækkun í fyrsta skipti á háskólastigi

Á háskóla- og doktorsstigi útskrifuðust 3.435 nemendur með 3.459 próf skólaárið 2008-2009. Brautskráðum nemendum fækkaði um 171 eða 4,7%. Brautskráðum nemendum á háskólastigi hefur fjölgað ár frá ári frá skólaárinu 1997-1998 þar til nú. Fækkunin stafar aðallega af fækkun brautskráninga með fyrstu háskólagráðu, sem fækkaði um 249 (10,5%). Hins vegar fjölgaði nemendum sem luku meistara- og doktorsgráðu og hafa ekki verið fleiri á einu skólaári. Brautskráðum nemendum með meistaragráðu fjölgaði um 144 (19,6%), úr 735 í 879, og doktorum um 5 (21,7%), úr 23 í 28. Konur voru tæplega tveir þriðju (65,9%) þeirra sem útskrifuðust með háskólapróf, sem er lítið eitt lægra hlutfall en verið hefur undanfarin ár.

Færri luku háskólanámi en áður mbl.is

• 3 blogg um fréttina

Bloggað um fréttina

• Jakobína Ingunn Ólafsdóttir: Léleg menntun á Íslandi vel varðveitt leyndarmál
• Bjarni Kjartansson: Svo er stóra spurningin.
• Magnús Sigurðsson: Í tilefni dagsins.