Engar ákvarðanir enn um aðgerðir
Guðbjartur Hannesson, Steingrímur J. Sigfússon,. Jóhanna Sigurðardóttir og Árni Páll Árnason mbl.is/Ómar
Engar niðurstöður urðu á fundi sérfræðingahóps ríkisstjórnarinnar með Marinó G. Njálssyni, fulltrúa Hagsmunasamtaka heimilanna, í gær þar sem rætt var um skuldavanda heimilanna.
Marinó segir að menn hafi farið yfir stöðuna á fundinum og rætt kosti og galla þeirra hugmynda sem komið hafi fram. Hugmynd samtakanna um 18% almenna niðurfellingu skulda hafi ekki verið rædd sérstaklega en verði tekin fyrir á fundi í dag.
Ragnheiður Elín Árnadóttir, formaður þingflokks sjálfstæðismanna, segir að eftir að Ögmundur Jónasson hafi enn einu sinni komið með skoðun sem gangi þvert á orð Steingríms J. Sigfússonar vakni spurningar um það hver sé stefna ríkisstjórnarinnar í þessu máli, eins og raunar öðrum. „Það þýðir ekkert fyrir VG að vera bæði með og á móti,“ segir Ragnheiður Elín.
„Það bendir sífellt fleira til þess sem ég óttaðist í upphafi, að ríkisstjórnin væri að setja upp einhverja leiksýningu til að bregðast við ástandinu,“ segir Sigmundur Davíð Gunnlaugsson, formaður Framsóknarflokksins. Hann efast um að alvara hafi verið á bak við þá afstöðu forsætisráðherra að taka undir hugmyndir um almenna skuldaleiðréttingu, að því er fram kemur í umfjöllun um þessi mál í Morgunblaðinu í dag.
