Ísland er í 17. sæti á nýjum þróunarlista Sameinuðu þjóðanna, þar sem lagt er mat á fjölda hagstærða og annarra þátta, sem hafa áhrif á
lífsgæði í löndunum, svo sem þjóðartekjur á mann, ævilengd og menntunarstig. Ísland var í 1. sæti á þessum lista ásamt Noregi árið 2007 og í 3. sæti í fyrra. Noregur er í 1. sæti á listanum í ár eins og í fyrra.
Í 2. sæti á listanum er Ástralía og Nýja-Sjáland er í 3. sæti, að því er kemur fram á vef Stavanger Aftenblad í Noregi, sem fjallar um skýrsluna í dag. Í þremur neðstu sætum eru Níger, Lýðveldið Kongó og Simbabve. Nokkur lönd eru ekki á listanum vegna þess að upplýsingar skortir. Meðal þeirra eru Kúba, Norður-Kórea og Írak.
Þau lönd, sem hafa hækkað mest á síðustu árum eru Óman, Kína, Nepal, Indónesía og Sádi-Arabía.
Efstu löndin á lista Þróunaráætlunar SÞ:
Noregur, einkunn 0,938
Áustralía, 0,937
Nýja-Sjáland, 0,907
Bandaríkin, 0,902
Írland, 0,895
Liechtenstein, 0,891
Holland, 0,890
Kanada, 0,888
Svíþjóð, 0,885
Þýskaland, 0,885
Japan, 0,884
Suður-Kórea, 0,877
Sviss, 0,874
Frakkland, 0,872
Ísrael, 0,872
Finnland, 0,871
Ísland, 0,869
Belgía, 0,867
Danmörk, 0,866
Spánn, 0,863.