Farið yfir Icesave-viðræður

Þrír ráðherrar fóru yfir stöðu viðræðna við Breta og Hollendinga um Icesave-málið á fundi utanríkismálanefndar í kvöldmatarhléi á Alþingi í kvöld. Málið var talsvert rætt en í trúnaði, að sögn Árna Þórs Sigurðssonar, formanns nefndarinnar, og því ekki hægt að greina frekar frá því á þessu stigi.

Fundurinn var boðaður að ósk Bjarna Benediktssonar, formanns Sjálfstæðisflokksins.

Steingrímur J. Sigfússon fjármálaráðherra, Össur Skarphéðinsson utanríkisráðherra og Árni Páll Árnason efnahags- og viðskiptaráðherra mættu sem gestir á fund nefndarinnar. Fundurinn stóð í rúma klukkustund.

Íslenska samninganefndin fór í morgun til viðræðna við fulltrúa Breta og Hollendinga og var fundum ekki lokið þegar utanríkismálanefnd fundaði, að sögn Árna Þórs.

„Ég er hvorki bjartsýnn né svartsýnn. Eins og komið hefur fram standa einhver atriði útaf núna og menn eru að reyna að ná saman um þau,“ sagði Árni Þór þegar hann var spurður að því hvort hann væri bjartsýnn um að samningar tækjust í þessari lotu.

• 6 blogg um fréttina

Bloggað um fréttina

• ÞJÓÐARHEIÐUR - SAMTÖK GEGN ICESAVE: Enn sama Icesave-leyndarhyggjan: „Málið var talsvert rætt en í trúnaði"
• Ómar Geirsson: Bjarni makkar með ICEsave stjórninni.
• Gunnar Heiðarsson: Icesave - piece of cake, eins og tvær þrjár flugvélar!!
• Björn Birgisson: Við eigum okkur framtíð!
• Magnús Helgi Björgvinsson: Ætlar þessu aldrei að ljúka!
• Ívar Pálsson: Styðjum íslensku lausnina