Háskólinn á Bifröst

Bryndís Hlöðversdóttir verður rektor Háskólans á Bifröst og tekur því við starfinu af Magnúsi Árna Magnússoni, fráfarandi rektor. Bryndís hefur störf 5. janúar næstkomandi en samkvæmt heimildum Morgunblaðsins átti ráðningin sér skamman aðdraganda.

Ekki náðist í Magnús Árna símleiðis.

Hrafnhildur Stefánsdóttir, formaður stjórnar Háskólans á Bifröst, segir Magnús Árna hafa óskað eftir því í umræðum sem fram fóru um framtíð skólans hvort hann gæti snúið sér að kennslu við skólann.

„Háskólinn á Bifröst verður efldur sem sjálfstæður háskóli og horfið hefur verið frá hugmyndum um sameiningu við aðra háskóla. Þetta er niðurstaða stjórnar skólans, stjórnenda hans og hollvina sem hafa unnið sameiginlega að framtíðarstefnumörkun fyrir skólann á síðustu vikum sem miðar að því að renna styrkari stoðum undir starfsemi hans og efla hann faglega og fjárhagslega,“ segir Hrafnhildur. 

„Magnús Árni Magnússon, rektor Háskólans á Bifröst, hefur óskað eftir að láta af starfi rektors nú um áramótin og hyggst snúa sér að kennslu og rannsóknum. Samkomulag er um að hann starfi sem dósent við skólann frá sama tíma.

Bryndís Hlöðversdóttir dósent og deildarforseti lagadeildar hefur verið ráðin rektor í stað Magnúsar og verða formlega rektorskipti þann 5. janúar 2011 í Hriflu á Bifröst.“

Hrafnhildur segir niðurstöðuna ánægjulega.

„Mikill vilji og eindrægni hafi ríkt í baklandi skólans um að tryggja framtíð Háskólans á Bifröst sem öflugs skóla. Með náinni samvinnu stjórnar, starfsmanna og hollvina skólans hafi það tekist.“ 

Bryndís Hlöðversdóttir