Segjast geta tekið við Landhelgisgæslunni

Bæjarstjórn Reykjanesbæjar segist reiðubúinn til samstarfs við innanríkisráðuneytið um hagkvæmniathugun og  undirbúning  þess  að  flytja  Landhelgisgæsluna  til Suðurnesja í samræmi við yfirlýsingu ríkisstjórnar Íslands.

Í ályktun, sem samþykkt var á fundi bæjarstjórnar í gær segir, að á Reykjanesi  sé húsnæði, flugbrautir, góð hafnaraðstaða og stoðkerfi sem fullnægi  þörfum  Landhelgisgæslunnar  að  öllu leyti.  Stórt og fullkomið flugskýli sé á Ásbrú. Þá geti Njarðvíkurhöfn strax tekið við skipaflota Landhelgisgæslunnar.  Frá Reykjanesbæ sé stutt á aðalstarfssvæði  Landhelgisgæslunnar,  hafsvæðið  í  kringum Ísland. 

Þá megi ætla að aukin starfsemi Landhelgisgæslunnar í kjölfar breytinga á starfsemi Varnarmálastofnunar,  kalli  á stærra húsnæði og nálægð við þau tæki og tól sem heyra undir hana.

„Með flutningi Landhelgisgæslunnar til Reykjanesbæjar myndi ríkisvaldið sýni í  verki stuðning sinn við endurreisn atvinnulífs á Suðurnesjum auk þess að gera   Landhelgisgæsluna   að   mun  öflugri  stofnun  til  hagsbóta  fyrir sjófarendur, sjúklinga og landsmenn alla," segir í samþykkt bæjarstjórnarinnar.

• 1 blogg um fréttina

Bloggað um fréttina

• Jóhann Elíasson: EINA VITIÐ AÐ FLYTJA LHG Á SUÐURNESIN..........................