Ólafur Þór Hauksson, sérstakur saksóknari. mbl.is/Ómar

Þau gögn sem embætti sérstaks saksóknara fær nú afhent frá Banque Havilland, áður Kaupþingi í Lúxemborg, varða rannsókn á viðskiptum með hlutabréf í bankanum sjálfum sem og viðskipti með skuldatryggingar, sem ætlað var að hafa áhrif á skuldatryggingarálag.

Húsleit á vegum embættisins var gerð í febrúar í fyrra, en viðskiptavinir Banque Havilland kærðu afhendingu gagnanna. Því hafa þau ekki fengist afhent fyrr en nú, eftir að Hæstiréttur í Lúxemborg úrskurðaði þar um.

„Þetta snertir aðallega hlutabréfaviðskiptin og svo skuldatryggingarálagsviðskipti,“ segir Ólafur Þór Hauksson, sérstakur saksóknari. Um er að ræða grun um markaðsmisnotkun með skuldatryggingar, sem lýsir sér í því að bankinn sjálfur lánar til viðskipta með tryggingarnar, og hefur þannig áhrif á verð þeirra.

Ólafur segir rannsóknina ekki hafa verið í biðstöðu síðan ljóst varð að töf yrði á afhendingu gagnanna.

„Nei, hún hefur ekki verið það. En það er náttúrulega ljóst að þetta er mikilvægur áfangi í að koma henni áfram.“

Um er að ræða mikið magn gagna sem embættið fær nú í hendur. Ólafur segist þó ekki reikna með að það taki embættið sérstaklega langan tíma að vinna úr þeim.

„Við erum komin í ágætis þjálfun við að eiga við mikið gagnamagn,“ segir hann. „Þannig að það er ekkert nýtt fyrir okkur. Í sumum málum hleypur fjöldi tölvupósta á milljónum.“

Ólafur segir það ekki síður stóran áfanga að nú hafi embættið byggt upp þekkingu á því hvernig rétt sé að eiga við yfirvöld í Lúxemborg. Hann bendir einnig á það að fyrir áramót hafi verið samþykkt lagabreyting sem felli áfrýjunarstigið út, og því ætti að taka skemmri tíma að fá úr málum skorið.

Fær aðgang að gögnum Havilland