Dómur um skipulag Flóahrepps staðfestur

Hæstiréttur hefur staðfest þá niðurstöðu Héraðsdóms Suðurlands, að ógilda beri ákvörðun umhverfisráðherra, sem hafnaði því að staðfesta breytingu á aðalskipulagi  Flóahrepps vegna Urriðafossvirkjunar.

Svandís Svavarsdóttir, umhverfisráðherra, synjaði í janúar á síðasta ári að staðfesta hluta aðalskipulags Flóahrepps sem varðaði Urriðafossvirkjun. Byggði Svandís ákvörðun sína á því að greiðsla Landsvirkjunar á viðbótarkostnaði sveitarfélagsins við gerð aðalskipulagsins vegna virkjunarinnar hafi verið andstæð ákvæðum þágildandi skipulags- og byggingarlaga.

Flóahreppur höfðaði mál og krafðist ógildingar á þeirri ákvörðun umhverfisráðherra. Héraðsdómur féllst á þá kröfu og nú hefur Hæstiréttur staðfest þá niðurstöðu. Segir dómurinn að hvergi sé í skipulags- og byggingarlögum heimild til ráðherra að synja um staðfestingu aðalskipulags að hluta.

Þá segir Hæstiréttur að ákvæði í samningi Flóahrepps og Landsvirkjunar um að Landsvirkjun greiði viðbótarkostnað sveitarfélagsins við gerð aðalskipulagsins vegna virkjunarinnar hafi ekki haft áhrif á það hvort gert yrði ráð fyrir virkjuninni í aðalskipulagi hreppsins. 

• 5 blogg um fréttina

Bloggað um fréttina

• Benedikt V. Warén: Umhverfisráðherra fær á snúðinn.
• Sigurjón Benediktsson: Hæstaréttardómara í nauðungarvinnu, strax! STASI í málið.
• Einar B Bragason : Svandís ráðhverfa í umhverfisráðuneytinu mígur en í stól sinn
• Sigurður Jónsson: Kjaftshögg fyrir Svandísi umhverfisráðherra.
• Jón Ríkharðsson: Er enginn sem skilur ríkisstjórnina?