Selfoss. www.mats.is

Fjórir menn eru í haldi lögreglunnar á Selfossi en þeir réðust á mann í dag vopnaðir öxi. Árásarmennirnir og sá sem ráðist var á þekktust og leikur grunur á að árásin tengist fíkniefnaviðskiptum.

Tveir menn tilkynntu til lögreglunnar á Selfossi, að þeir hefðu verið á gangi skammt frá verslun N1 á Selfossi þegar pallbíl, sem í voru fjórir menn, var ekið að þeim. Mennirnir fjórir stigu út úr bílnum og einn var með öxi. Hann réðist að öðrum gangandi manninum og sló til hans með öxinni. 

Að sögn lögreglu tókst þeim, sem ráðist var á, að víkja sér undan fyrsta og öðru högginu en árásarmanninum tókst síðan að koma þremur lausum höggum á manninn sem féll við það í götuna. Eftir það héldu árásarmennirnir á brott.

Sá sem ráðist var á slapp með minniháttar áverka.  Leitað var eftir aðstoð sérsveitar ríkislögreglustjóra til að leita að mönnunum og handtaka og höfðu þeir allir náðst innan klukkutíma. Tveir þeirra fundust á Eyrarbakka og hinir tveir á Selfossi. 

Árásarmennirnir og sá sem ráðist var á þekktust og leikur grunur á að árásin tengist fíkniefnaviðskiptum. Lögreglan segir, að rannsókn málsins beinist meðal annars að því og muni hún standa fram á kvöld og  halda síðan áfram í fyrramálið. 

Árásarmennirnir losuðu sig við öxina á Selfossi og hún er ófundin. Tekin verður tekin afstaða til þess í fyrramálið hvort farið verður fram á gæsluvarðhald á þeim sem hafði sig mest í frammi í árásinni.