Sérstakur stýrihópur hefur að undanförnu haft forystu um útfærslu áætlunar um losun gjaldeyrishafta. Efnahags- og viðskiptaráðherra stýrir hópnum, sem í sitja auk hans fjármálaráðherra, seðlabankastjóri og forstjóri Fjármálaeftirlitsins.
Seðlabankinn hefur á undanförnum vikum unnið að gerð áætlunar um losun gjaldeyrishafta í samráði við stjórnvöld. Bankinn mun í næstu viku afhenda stýrihópnum greinargerð sína og drög að tillögum.
Í kjölfar þess verður tillaga að áætlun um afnám hafta lögð fyrir ríkisstjórn. Gert er ráð fyrir að ríkisstjórnin taki afstöðu til áætlunarinnar eigi síðar en 11. mars.