Nýir nefndarmenn í stað Lilju og Atla

Sex þingmenn Vinstri grænna munu taka sæti í þeim sex nefndum sem þau Atli Gíslason og Lilja Mósesdóttir sátu í, skv. upplýsingum frá framkvæmdastjóra flokksins. Atli og Lilja sögðu sig úr þingflokki VG í dag.

Lilja Rafney Magnúsdóttir mun taka sæti Atla í sjávarútvegs- og landbúnaðarnefnd Alþingis. Atli var formaður nefndarinnar, en ekki liggur fyrir hver muni veita nefndinni formennsku.

Árni Þór Sigurðsson mun taka sæti Atla í allsherjarnefnd, en Atli var varaformaður nefndarinnar.

Þá mun Björn Valur Gíslason setjast í viðskiptanefnd í stað Atla.

Álfheiður Ingadóttir mun taka sæti Lilju í viðskiptanefnd, en Lilja var formaður nefndarinnar. Ekki er búið að ákveða hver taki við formennskunni. 

Þuríður Backman mun taka sæti Lilju í menntamálanefnd.

Loks mun Þráinn Bertelsson setjast í iðnaðarnefnd í stað Lilju.