Ísbjörninn á leið til Reykjavíkur. Mynd / Jón Hálfdán Pétursson

Umhverfisstofnun segir að ákveðið hafi verið að fella hvítabjörninn, sem sást í morgun í Hælavík á Hornströndum, af öryggisástæðum. Hefur ísbjarnarhræið verið flutt til Reykjavíkur þar sem Náttúrufræðistofnun Íslands tekur við dýrinu og rannsakar það.

Í morgun barst Landhelgisgæslunni tilkynning um dýrið og flaug þyrla Gæslunnar á Ísafjörð þaðan sem flogið var á Hornstrandir.

Umhverfisstofnun segir í tilkynningu að þegar þangað var komið hafði dýrið fært sig um set og fannst eftir nokkra leit í Rekavík (Bakhöfn). Þoka var í efstu brúnum og var mikil yfirferð á dýrinu.

„Lögreglan á Ísafirði var með í för og mat aðstæður þannig að ómögulegt væri að vakta dýrið allan sólarhringinn á svæðinu og tryggja þannig að það færi ekki í sjó eða flytti sig um set í átt að byggð. Því var tekin ákvörðun um að fella dýrið af öryggisástæðum,“ segir í tilkynningu.

Þá segir að unnið hafi verið í samræmi við viðbragðsáætlun um viðbrögð við landtöku hvítabjarna. Lögreglan á Ísafirði hafi stjórnað aðgerðum og með í för hafi verið fulltrúar Umhverfisstofnunar, fulltrúi yfirdýralæknis ásamt reynslumiklum skyttum.

Hvítabirnir eru stærstu landrándýr jarðar, stórhættulegir og óútreiknanlegir. Talið er að heimsstofn hvítabjarna telji 22.000 dýr í dag. Flesta hvítabirni er að finna í Kanada. Hvítabirnir eru á lista IUCN (Alþjóðanáttúruverndarsamtökin) yfir dýr í yfirvofandi hættu. Þrátt fyrir þetta styður hvítabjarnarráð IUCN sjálfbæra nýtingu á öllum 19 stofnum hvítabjarna. Um 800 dýr eru felld árlega.

Árið 2009 var unnin skýrsla starfshóps sem umhverfisráðherra skipaði um tillögur að viðbrögðum við landgöngu hvítabjarna.