Ungir bændur spyrja fyrirtæki um innflutning

Samtök ungra bænda hafa sent erindi á 20 fyrirtæki að handahófi sem aðild eiga að Samtökum verslunar og þjónustu og spyrja hvort fyrirtækin áformi að flytja inn landbúnaðarvörur.

Erindið sem aðildarfélög SVÞ fengu sent var svo hljóðandi:
„Samtök ungra bænda harma afstöðu þinna hagsmunasamtaka þ.e. Samtaka verslunar og þjónustu gagnvart innlendri búvöruframleiðslu og hagsmunum bænda.
 
Undanfarnar vikur hafa Samtök verslunar og þjónustu farið mikinn í almennri umræðu varðandi innflutning á kjöti til Íslands. Greint hefur verið frá því að Samtök verslunar og þjónustu undirbúi nú innflutning á kjötvörum sem munu koma í beina samkeppni við innlenda framleiðslu bænda.
 
Innlend búvara hefur allt frá hruni haldið aftur af vísitölu neysluverðs og verið mikilvægur hlekkur í því að halda niðri verði á matarkörfu heimilanna. Ekki er nokkur vafi á að með þeirri samfélagslegu ábyrgð sem bændur hafa sýnt með því að koma ekki öllum þeim hækkunum sem þeir hafa þurft út í almennt verðlag hafa þeir tekið á sig byrðar sem fyrir vikið hafa ekki lent á neytendum.
 
Því þykir Samtökum ungra bænda miður að hagsmunasamtök þín vilji í heild sinni hefja innflutning á kjötvörum til Íslands og stuðla þannig að samdrætti í innlendri framleiðslu og veikara atvinnulíf innanlands. Með því að flytja inn vörur sem nú þegar eru framleiddar á Íslandi er tekin óábyrg afstaða til samfélagsins og vegið að innlendri atvinnustarfsemi.
 
Því spyrja Samtök ungra bænda fyrirtæki þitt hvort þessi fyrirhugaði innflutningur sé gerður í umboði þíns fyrirtækis?“

• 1 blogg um fréttina

Bloggað um fréttina

• Jón Ingi Cæsarsson: Hvaða öld er hjá ungum bændum?