Eldri borgarar taka út peninga
Íbúðir fyrir eldri borgara mbl.is/RAX
Það hefur færst í vöxt að eldri borgarar taki út fé af bankareikningum og leggi inn á bankahólf. Ástæðan er skerðing bóta vegna vaxtatekna, hærri fjármagnstekjuskattur og neikvæðir raunvextir af innistæðum vegna verðbólgu, að sögn Jónu Valgerðar Kristinsdóttur, formanns Félags eldri borgara.
Eins og fram kom á fréttavef Morgunblaðsins í gær eru uppi hugmyndir innan Vinstri grænna um að hækka fjármagnstekjuskatt í 30%.
Vextir langt undir verðbólgu
Jóna Valgerður varar eindregið við slíkri hækkun en skatturinn var sem kunnugt er 10% fyrir fjármálahrunið.
„Það væri fáranlegt að hækka fjármagnstekjuskattinn. Það er þegar búið að tvöfalda hann. Þá hafa raunvextir verið neikvæðir. Ég veit um eldri borgara sem hafa tekið fé sitt út af bankabókum og lagt inn á bankahólf. Fólk fær 2,2-2,5% vexti. Til samanburðar er verðbólgan nú um 5%.
Svo eru verðbætur líka skattlagðar. Ég hef tekið þátt í starfi endurskoðunarnefndar um almannatryggingar og þekki því vel til þessara mála. Fjármagnstekjuskatturinn á ekki að reiknast út frá vaxtatekjum að fullu, enda eru vextir í mörgum tilfellum neikvæðir.“
Verðbólgan þýðir neikvæða raunvexti
En hvaða áhrif hefði hækkun fjármagnstekjuskatts í 30% á hag eldri borgara sem hafa lagt fyrir fé á lífsleiðinni?
„Það hefði gífurleg áhrif. Vaxtatekjur eru reiknaðar að fullu sem viðbótartekjur og koma þar með til skerðingar á bótum almannatrygginga.Tekjurnar draga því úr þeim bótum sem fólk á rétt á jafnvel þótt raunvextir séu neikvæðir.
Ég hefði ætlað að ríkisstjórnin legði metnað sinn í að stuðla að auknum sparnaði. Sú hækkun á fjármagnstekjuskatti sem þarna er rætt um myndi draga úr áhuga fólks á sparnaði. Það myndi jafnframt færast í vöxt að fólk tæki út fé og setti inn á bankahólf. Margir eldri borgarar horfa þegar fram á rýrnun sparifjár síns vegna verðbólgunnar,“ segir Jóna Valgerður.
