Skúli Mogensen, fjárfestir og aðaleigandi MP banka, fær jarðir Orkuveitu Reykjavíkur, Hvamm og Hvammsvík í Kjósarhreppi með húsakosti en án vatnsréttinda, fyrir 155 milljónir króna en fyrir um þremur árum var boði upp á 230 milljónir ekki tekið.
Á fundi borgarráðs 19. júní 2008 var lögð fram tillaga forstjóra Orkuveitu Reykjavíkur um sölu á fyrrnefndum jörðum ásamt greinargerð, sem samþykkt var á fundi stjórnar Orkuveitunnar 14. apríl sama ár. Þar kemur m.a. fram að fasteignasali hafi metið jarðirnar með jarðhitaréttindum á 180 milljónir króna 2006.
Árið 2007 hafi borist tilboð í jörðina upp á 180 milljónir og var þá gert ráð fyrir takmörkuðum nýtingarrétti kaupanda á jarðhita. Lagt var til að OR seldi jarðirnar en stæði vörð um jarðhitaréttindin.
Á borgarráðsfundi 3. júlí 2008 kom fram að hæsta tilboð í jörðina hafi verið 230 milljónir.