Hatursáróður á morgunverðarfundi

Hatursáróður verður umfjöllunarefni fimmta fundarins í fundaröð innanríkisráðuneytisins um mannréttindamál í tengslum við mótun landsáætlunar í mannréttindum. Fundurinn verður haldinn í Iðnó í Reykjavík fimmtudaginn 26. apríl klukkan 8.30 til 10.30.

Á fundinum verður fjallað um hatursáróður í víðu samhengi meðal annars með hliðsjón af samfélagslegri umræðu á síðustu misserum og athugasemdum alþjóðlegra eftirlitsaðila með mannréttindaskuldbindingum, bæði á vettvangi Evrópuráðsins og Sameinuðu þjóðanna um hatursáróður og kynþáttafordóma. Þetta kemur fram á heimasíðu innanríkisráðuneytisins.

Fundurinn er öllum opinn og er aðgangur ókeypis. Hægt verður að kaupa léttan morgunverð á staðnum. Táknmálstúlkun verður til staðar hafi þess verið óskað fyrirfram. Hægt er að óska eftir táknmálstúlkun til 23. apríl kl. 14.00 með því að senda tölvupóst á netfangið: mailto:mlinda.ros.alfredsdottir@irr.is

Dagskrá fundarins verður sem  hér segir:

Ögmundur Jónasson innanríkisráðherra flytur ávarp í upphafi.

Framsöguerindi flytja:

Björg Thorarensen, prófessor við lagadeild Háskóla Íslands,
Margrét Steinarsdóttir, framkvæmdastjóri Mannréttindaskrifstofu Íslands,
Logi Kjartansson, lögfræðingur hjá stjórnsýslusviði Ríkislögreglustjóra,
Íris Ellenberger sagnfræðingur

Fulltrúar stjórnar- og stjórnarandstöðuþingmanna sem eiga sæti í allsherjar- og menntamálanefnd Alþingis taka þátt í pallborðsumræðum.

Fundarstjóri verður Karl Blöndal, aðstoðarritstjóri Morgunblaðsins.

Innanríkisráðuneytið hóf fyrir áramót fundaröðina um mannréttindamál í tengslum við mótun landsáætlunar í mannréttindum. Fundaröðin er liður í viðleitni ráðuneytisins til að tryggja að  stefnumótun í svo margþættum og mikilvægum málaflokki sem mannréttindi eru eigi sér ekki aðeins stað innan veggja ráðuneyta heldur í samstarfi og í beinum tengslum við hagsmunaaðila, fræðasamfélag og almenning.

• Blogga um frétt