Verðtryggð lán afleiðusamningar

Íbúðalánasjóði hefur verið stefnt fyrir Héraðsdómi Reykjavíkur vegna verðtryggs fasteignaláns. Hagsmunasamtök heimilanna styðja málsóknina sem byggir meðal annars á því að verðtryggð lán séu í raun flóknir afleiðusamningar og ómögulegt sé að gera sér grein fyrir heildarlántökukostnaði.

Í málssókninni er byggt á lögum um neytendalán, þar sem skýrt sé kveðið á um að tæmandi upplýsingar um heildarlántökukostnað skuli liggja fyrir við undirritun lánasamninga, miðað við raunverulegar forsendur. „Eftir gagngera úttekt með lögfræðingum á verðtryggðum lánasamningum telur stjórn samtakanna sýnt að slíkir samningar gangi sannanlega gegn ákvæðum neytendalánalaga um skýra upplýsingagjöf til neytenda,“ segir í tilkynningu frá samtökunum.

Samtökin segja að um sé að ræða mikilvægt prófmál sem geti haft mikla þýðingu fyrir fjölda íslenskra heimila sem „sitja uppi með stökkbreytt verðtryggð lán eftir vísitöluhækkanir í kjölfar bankahrunsins.“

• 1 blogg um fréttina

Bloggað um fréttina

• Guðmundur Ásgeirsson: Málshöfðun gegn verðtryggingu