Flugfélagið Ernir fór hátt í 20 sjúkraflugferðir til Svíþjóðar á árinu 2012, en félagið sinnir sjúkraflugi milli Íslands og annarra landa. Oftast var flogið með fólk í líffæraígræðslu til Gautaborgar en einnig voru farnar þónokkrar flugferðir til Stokkhólms með gjörgæslusjúklinga.
Í tilkynningu frá Flugfélaginu Erni segir að félagið hafi fest kaup á fullkomnum sjúkrabúnaði fyrir um tveimur árum og sé þetta einn fullkomnasti búnaður sem völ er á og samþykktur af Flugöryggisstofnun Evrópu, hann er ætlaður til nota í sjúkraflugi erlendis og er sá eini sinnar tegundar á landinu.
Um borð í vél félagsins er öndunarvél, hjartalínurit, gangráður, stuðtæki ásamt fjölda lyfja og sérhæfðs búnaðar til inngripa. Einnig eru bráðatæknar frá slökkviliði höfuðborgarsvæðisins í flestöllum sjúkraflugferðum félagsins.
Hjá Flugfélaginu Erni starfa um 50 manns og sinnir félagið samhliða sjúkrafluginu áætlunarflugi til fimm áfangastaða ásamt leiguflugi innanlands sem utan.