Umhverfis- og auðlindaráðuneytið hefur ákveðið úthlutun úr Veiðikortasjóði fyrir árið 2013. Í kjölfar auglýsingar um umsóknir um styrki úr sjóðnum til rannsókna á stofnum villtra fugla og villtra spendýra bárust 18 umsóknir til ráðuneytisins að upphæð tæplega 50 milljónir kr. Til úthlutunar voru samtals 29,3 milljónir.
Þetta kemur fram á vef ráðuneytisins.
Ráðuneytið hefur að fenginni umsögn Umhverfisstofnunar og áliti ráðgjafarnefndarinnar um umsóknirnar ákveðið að veita eftirfarandi aðilum styrki úr Veiðikortasjóði:
- Háskóla Íslands, krónur 2.150.000 til verkefnisins: Mynstur í framleiðni grágæsa á landsmælikvarða á Íslandi.
- Háskóla Íslands, Líf- og umhverfisvísindastofnun, krónur 3.000.000 til verkefnisins: Fækkun íslenskra sjófugla: talningar í fjórum stærstu fuglabjörgum landsins 2013.
- Melrakkasetri Íslands, krónur 3.450.000 til verkefnisins: Hvað eru refirnir að éta? — fæða íslenskra melrakka að vetrarlagi.
- Náttúrufræðistofnun Íslands, krónur 1.100.000 til verkefnisins: Sníkjudýrasýkingar, líkamsástand og stofnbreytingar rjúpu á Íslandi.
- Náttúrufræðistofnun Íslands, krónur 10.000.000 til verkefnisins: Vöktun rjúpnastofnsins og afrán fálka á rjúpu.
- Náttúrustofu Austurlands, krónur 2.000.000 til verkefnisins: Vetrartaling íslenska hreindýrastofnsins.
- Náttúrustofu Suðurlands, krónur 3.350.000 til verkefnisins: Rannsóknir á lunda 2013. Vöktun viðkomu, fæðu, líftala og könnun vetrarstöðva.
- Raunvísindastofnun Háskóla Íslands, krónur 2.240.000 til verkefnisins: Stofnlíkan fyrir rjúpu.
- Verkís, krónur 2.000.000 til verkefnisins: Vöktun á ungahlutfalli í veiðistofnum gæsa og anda, með aldursgreiningu vængja úr veiði, og vöktun á ungahlutfalli í friðuðum stofni blesgæsa.