4.519 heimili í vanskilum

Heimili í vanskilum hjá Íbúðalánasjóði eru 4.519 og þar af eru 640 heimili með frystingu á lánum sínum. Alls voru því 8,96% þeirra heimila sem eru með fasteignalán sín hjá Íbúðalánasjóði með lánin í vanskilum í lok maí. Þetta kemur fram í skýrslu Íbúðalánasjóðs fyrir maímánuð.

Í lok maí nam fjárhæð vanskila útlána til einstaklinga 4,8 milljörðum króna og var undirliggjandi lánavirði 84,5 milljarðar króna eða um 12,75% útlána sjóðsins til einstaklinga.

Þetta samsvarar 0,29% lækkun frá fyrra mánuði og var undirliggjandi hlutfall lánafjárhæðar í vanskilum í lok maí 1,01% lægra en sama hlutfall í maí 2012.

Fjárhæð vanskila útlána til lögaðila nam alls 3 milljörðum króna og nam undirliggjandi lánavirði 31,6 milljörðum króna. Tengjast því vanskil um 21,35% lánafjárhæðar sjóðsins til lögaðila, sem samsvarar 1,09% lækkun frá fyrri mánuði og er 0,51% lægra hlutfall en í lok maí 2012.

Vanskil eða frystingar ná samtals til 14,33% lánasafnsins, en sambærilegt hlutfall í maí 2012 nam 15,24%. Vanskil teljast hér lán í vanskilum umfram 90 daga vanskil og lán sem eru í frystingu.

Heildarútlánin 1 milljarður í maí

Heildarútlán Íbúðalánasjóðs í maí 2013 námu einum milljarði króna, en þar af voru 530 milljónir króna vegna almennra lána. Til samanburðar námu almenn útlán í maí 2012 um 890 milljónum króna. Meðalfjárhæð almennra lána var 9,9 milljónir króna.

Heildarvelta íbúðabréfa nam um 38,1 milljarði króna í maí samanborið við 28,3 milljarða í apríl 2013.

Greiðslur Íbúðalánasjóðs vegna íbúðabréfa og annarra skuldbindinga námu 670 milljónum króna í maí. Uppgreiðslur námu 1,3 milljörðum króna.

• 2 blogg um fréttina

Bloggað um fréttina

• Páll Vilhjálmsson: Rúm 9% heimila í vanskilum, 91% í skilum
• Haraldur Haraldsson: 4.519 heimili í vanskilum//Vandamálin hlaðast upp,hvað er til ráða???