„Síðustu 10 daga tók ég eftir því að sprækur geitungur kíkti oft við í heimsókn í herbergið mitt,“ segir Daníel Már Pálsson en hann uppgötvaði geitungabú innan á svefnherbergisglugganum sínum í gær.
„Geitungurinn vakti mig snemma á morgnana en mér líkaði bara ágætlega við hann.“ Nokkrum dögum síðar voru geitungarnir orðnir tveir og heimsóknir þeirra færðust í aukana.
„Þegar þeir voru farnir að vera með óþarflega mikil læti ákvað ég að athuga stöðu mála, eins og sönnum karlmanni sæmir. Ég ætlaði að loka glugganum til að binda enda á þessar kæruleysislegu heimsóknir þeirra félaga. Ég kíkti á bakvið gardínurnar og dótið í glugganum og þá blasti við mér eitt stykki hlussu geitungabú hangandi inni í glugganum í herberginu mínu,“ segir Daníel meðal annars í Morgunblaðinu í dag.