Héraðsdómur Norðurlands eystra hefur dæmt ungan karlmann til að greiða 60 þúsund króna sekt til ríkissjóðs fyrir ólögmæta meðferð fundins fjár. Maðurinn sló eign sinni á farsíma sem hann fann og tók til notkunar sem sína eign.
Maðurinn ungi fann farsíma að gerðinni iPhone 4S í Hafnarstræti á Akureyri í lok maí 2013. Hann hóf að nota símann sjálfur en það uppgötvaðist og var maðurinn kærður og í kjölfarið ákærður.
Hann viðurkenndi fyrir dómi brot sitt en maðurinn hefur ekki áður sætt refsingu. Þá lýsti hann yfir iðran vegna gjörða sinna.