Skólpið vannýtt auðlind

„Hægt væri að vinna áburð úr því skólpi sem við hleypum út í sjó,“ segir Kristín Vala Ragnarsdóttir, prófessor við jarðvísindadeild Háskóla Íslands. Strendur Íslands eru mengaðar af skólpi og brýnt sé að „láta ekki næringarefnin fara út í sjó þar sem við náum ekki í þau aftur“.

Þá bendir Kristín á að þótt flest lönd veiti skólpinu út í sjó fjölgi þeim löndum sem vinna skólpið og nýta sem áburð, t.d. Evrópa, Kína og Afríka. Kallast þessi áburður „night soil“ í Kína, að því er fram kemur í Morgunblaðinu í dag.

Þetta er meðal þess sem verður rætt á málþingi í dag sem ber yfirskriftina: Matvælaöryggi á Íslandi. Þar verða kynntar niðurstöður samleiðniverkefnis sem undanfarin fjögur ár hefur rannsakað hvernig mannkynið getur búið á sjálfbæran máta innan þeirra marka sem jörðin setur.