„Við eigum eftir að taka bréfið fyrir hjá nefndinni. Því hefur verið beint til hennar og við munum taka það fyrir. Hvort sem það verður gert á næsta fundi eða þarnæsta þá verður það gert fljótlega.“
Þetta segir Ögmundur Jónasson, þingmaður Vinstrihreyfingarinnar - græns framboðs og formaður stjórnskipunar- og eftirlitsnefndar Alþingis, í samtali við mbl.is en Víglundur Þorsteinsson, lögfræðingur og fyrrverandi stjórnformaður BM Vallár, hefur sent nefndinni bréf, þar sem hann fer þess á leit að hún upplýsi þjóðina um það ferli sem leiddi til þess að erlendir kröfuhafar eignuðust tvo ríkisbanka í tíð síðustu ríkisstjórnar.
Ögmundur segir aðspurður að þar sem bréfið hafi ekki verið tekið fyrir af nefndinni sé ekki hægt að tjá sig um innihald þess að svo stöddu.