Jón Steinar Gunnlaugsson, fyrrverandi hæstaréttardómari, segir að sér virðist sem dómarar í Hæstarétti skipti með sér verkum þannig að einn dæmi í málum og hinir skrifi svo undir dóminn. Sératkvæðum hefur fækkað eftir brotthvarf Jóns Steinars og segir hann dómara treysta um of hver á annan.
Þetta kemur fram á vef Viðskiptablaðsins og er boðað ítarlegra viðtal við Jón Steinar í blaðinu sem kemur út á morgun. Á vefnum segir Jón Steinar að mikill málafjöldi í Hæstarétti hafi alið af sér þá stefnu að dómarar skipti með sér verkum í stað þess að komast að sjálfstæðri niðurstöðu. Þar með sé tilgangurinn með fjölskipuðum dómi fyrir bí, en hann sé að hver og einn vinni sjálfstætt að sakarefninu.