Íbúar höfuðborgarsvæðisins fagna sólinni og rigningarlausu dögunum en heldur bjartara hefur verið í vikunni en oft áður í sumar. Rigning sumarsins á höfuðborgarsvæðinu hefur aftur á móti haldið frjótölum niðri en núna, þegar stytt hefur upp og sólin skín, rjúka tölurnar upp. Algengt er að grasfrjó nái hámarki um mánaðamótin júlí og ágúst.
Á þessum tíma árs blómstrar grasið og þá er það víða óslegið. Þegar engin er úrkoman eru kjöraðstæður fyrir grasfrjó. Frjótölurnar geta hækkað á góðviðrisdögum fram til loka ágústmánaðar.
Á vef Náttúrufræðistofnunar Íslands segir að á Akureyri hafi frjótala fyrir gras farið vel yfir 50 frjó/m3 rétt eftir miðjan mánuðinn og fór frjótalan hæst í 307 frjó/m3 18. júlí en mikil áhætta er talin vera á ofnæmisviðbrögðum þegar frjótala grasa fer yfir 50 frjó/m3.
Toppurinn af grasfrjóum 18. júlí er annar hæsti toppurinn sem mælst hefur á Akureyri síðan mælingar hófust en algengara er þó að hámark grasfrjóa sé í ágúst og því ekki gott að segja hvort hámarkinu sé náð í ár.
Rigningin á höfuðborgarsvæðinu hefur hins vegar haldið frjótölum niðri en um leið og styttir upp þá rýkur frjótalan upp. Dagana 14.–19. júlí fór frjótala grasa ekki yfir 10 frjó/m3 sem þykir mjög lágt fyrir þennan árstíma en 20. júlí stytti upp og við það rauk frjótala grasa upp í 132 frjó/m3.
Búast má við áframhaldandi háum frjótölum fyrir gras næstu vikurnar en sem fyrr segir er algengast að grasfrjó nái hámarki um mánaðarmótin júlí og ágúst.