Forstjóri Landsvirkjunar segir að ríkisfyrirtækið hafi lengi reynt að losa sig við varaaflsstöðvar í Straumsvík og á Rangárvöllum. Íslenskt eldsneyti hefur keypt vélarnar og selt þær aftur til Aserbaídsjan og Suður-Afríku.
Umræddar rafstöðvar hafa ekki verið í almennri notkun frá árinu 1982. Að sögn Harðar Arnarsonar, forstjóra Landsvirkjunar, hefur heildarnotkun á rafstöðvunum verið upp á 0,3 gígavattstundir undanfarin 32 ár. Í því samhengi má benda á að ársframleiðsla Landsvirkjunar er upp á um 13 þúsund gígavattstundir.
„Það eru komnar upp annars konar varaaflsstöðvar núna. Landsnet, Rarik og fleiri eru búnir að setja upp varaaflsstöðvar sem eru miklu betri og ódýrari í rekstri,“ segir Hörður.