Þegar farnir að auglýsa jólahlaðborð

Um miðjan september eru fáir farnir að velta tilvonandi jólaös fyrir sér. Öðru gegnir með veitingahúsið Restaurant Reykjavík sem þegar er farið að auglýsa jólahlaðborð sitt.

„Við prófuðum í fyrra að auglýsa svona snemma. Þegar allir eru byrjaðir að auglýsa týnist maður svolítið í öllum auglýsingunum og pælingin á bak við þetta var að vera eina röddin á þessum tímapunkti.“

Þetta segir Björn Jóhannsson, bókunar- og markaðsstjóri hjá veitingahúsinu, í Morgunblaðinu í dag. Hann segir að þeir sem hafi þegar bókað séu flestir útlendingar sem bóki í gegnum ferðaskrifstofu. Útlendingar séu gjarnan hrifnir af íslenskum jólamat og sólgnir í hangikjöt.