Gríðarlegur munur á fasteignamati

Fasteignamat skrifstofubyggingar í Kópavogi hækkaði um 49% eftir að matið var uppreiknað í ár. Það er ekki í frásögur færandi nema fyrir þá sök að matið á húsinu við hliðina lækkaði um 42%.

Málið varðar fasteignirnar Hlíðasmára 9 og 11 sem eru frá sama tímabili. Skráð byggingarár Hlíðasmára 9 í fasteignaskrá er þannig árið 1999 en árið 2000 í Hlíðasmára 11.

Í umfjöllun um mál þetta í Morgunblaðinu í dag segir Guðmundur Sveinsson endurskoðandi, sem rekur fyrirtæki í Hlíðasmára 9, að heildarfasteignamatið á eigninni hafi hækkað úr 310,3 milljónum í 462,5 milljónir. Fyrir vikið hafa fasteignagjöld hækkað mikið. Húsið er fjögurra hæða og eru þar skrifstofur og verslanir.