Um 30 jarðskjálftar hafa mælst við öskju Bárðarbungu frá klukkan sjö í morgun en stærsti skjálftinn, sem mældist 4,8 stig, varð laust fyrir klukkan 18 í kvöld. Í ganginum hafa um 10 jarðskjálftar mælst á sama tímabili og voru þeir allir undir 1,5 stigum.
Segir frá þessu í tilkynningu frá Veðurstofu Íslands.
Jarðskjálftavirkni á svæðinu við gosstöðvarnar í Holuhrauni mælist nú svipuð og undanfarna daga. Hins vegar hefur enginn skjálfti mælst stærri en 5 stig frá því á mánudag sl.
Samkvæmt upplýsingum frá Veðurstofu Íslands virðist gangurinn í gosinu vera svipaður og undanfarna daga. Slæmt veður hefur haft nokkur áhrif á jarðskjálftamælingar á svæðinu en það veldur t.a.m. því að minni skjálftar mælast síður.