Bálhvasst er víða á Suðurlandi og hefur vindurinn farið í 47 metra á sekúndu í verstu hviðunum í nótt undir Eyjafjöllum. Búast má við talsverðri eða mikilli rigningu á Suðausturlandi og Austfjörðum í dag og hávaðaroki víða á landinu síðdegis og er ekki hægt að mæla með ferðalögum í dag.
Samkvæmt mælum Vegagerðarinnar hefur vindurinn einnig farið yfir 40 metra á sekúndu í Öræfum og Mýrdalnum.
Mjög fáir eru á sjó enda afar slæmt veður á miðunum, samkvæmt upplýsingum frá Landhelgisgæslunni.
Á vef Veðurstofu Íslands kemur fram að búast má við mjög snörpum vindhviðum undir Eyjafjöllum, í Mýrdal og Öræfum, en jafn vel víðar seinni partinn. Slæmt ferðaverður er í dag og ekkert útivistaveður til fjalla.
Í dag er spáð austanstormi og því má búast við gasmengun fyrir vestan eldstöðvarnar á svæðinu frá Hvalfirði í suðri og norður á Barðaströnd og í Hrútafjörð.
Á morgun (laugardag) er spáð norðaustanátt þ.a. gasmengunin verður líklega einkum bundin við suðvestanvert landið.
Bætt við klukkan 7
„Á Suðurlandi eru vegir greiðfærir en óveður er við Kjalarnes og víða um sunnanvert landið.
Vegir eru mikið auðir við Faxaflóa en hálka er á Holtavörðuheiði snjóþekja og éljagangur á Bröttubrekku og flughált á Laxárdalsheiði. Eins er óveður í Miðdölum.
Hálka, snjóþekja og jafnvel skafrenningur er á öllum helstu fjallvegum á Vestfjörðum. Þæfingsfærð er á leiðinni norður í Árneshrepp á Ströndum.
Á Norðurlandi er víðast hvar hálka, skafrenningur og éljagangur á vegum. Óveður er í Blönduhlíð. Hálka er á Mývatns- og Möðrudalöræfum.
Það er víða hálka eða snjóþekja á Austurlandi. Hálka og éljagangur er á Fjarðarheiði en hálka og óveður á Vatnsskarði eystra. Snjóþekja og snjókoma er á Oddsskarði en autt er frá Eskifirði með suðausturströndinni en óveður víða,“ samkvæmt tilkynningu frá Vegagerðinni.
Spáin fyrir næsta sólarhring:
Austan og norðaustan 18-25 m/s, hvassast syðst og víða talsverð rigning eða slydda, en snjókoma til fjalla N-lands. Búast má við mikilli úrkomu um tíma á SA-landi og Austfjörðum. Dregur talsvert úr vindi og úrkomu S-til undir kvöld. Norðaustan 18-23 og rigning eða slydda NV-til á morgun, en annars mun hægari og væta með köflum. Hiti 0 til 10 stig, mildast syðst.
Á laugardag:
Norðaustanhvassviðri eða stormur NV-til, en annars mun hægari. Rigning S- og A-lands, en annars slydda eða snjókoma. Hiti 0 til 6 stig, hlýjast syðst.
Á sunnudag:
Norðaustanhvassviðri eða -stormur, en hægari SA-til. Víða slydda eða snjókoma, en bjart með köflum SV-til. Dregur heldur úr vindi síðdegis. Kólnandi veður.
Á mánudag:
Allhvöss eða hvöss norðanátt og éljagangur A-til, en hægari og víða bjartviðri vestra. Frost 0 til 6 stig.
Á þriðjudag:
Suðvestlæg átt og víða bjartviðri, en hvessir og þykknar upp V-til síðdegis. Kalt í veðri.
Á miðvikudag:
Ákveðin sunnan- og suðaustanátt með slyddu eða rigningu og hlýnandi veðri.
Á fimmtudag:
Útlit fyrir suðaustanátt með rigningu, einkum SA-til.