Frístundaheimilin í Grafarvogi fögnuðu í dag 25 ára afmæli Barnasáttmála Sameinuðu þjóðanna með réttindagöngu þar sem gengið var frá Rimaskóla að Hlöðunni í Gufunesbæ.
Börnin hafa í vikunni verið að kynnast Barnasáttmálanum og voru mörg þeirra búin að föndra falleg spjöld með sínum áherslum, að því er fram kemur á fréttavefnum Gullinbrú.
Dagur B. Eggertsson, borgarstjóri Reykjavíkur, mætti í gönguna. Þar lýsti hann yfir ánægju með þetta framtak og bað börnin að klappa fyrir sér og öllum öðrum börnum í heiminum.
Barnasáttmáli Sameinuðu þjóðanna var lögfestur hér á landi 2. febrúar 2013 og er nú hluti af íslenskri löggjöf.
Þetta er í fyrsta skipti sem frístundaheimilin í Grafarvogi fara í slíka göngu, en stefnan er að gera þetta að árlegum viðburði.