Sigurður Þórir Sigurðsson, eigandi blómaverslunarinnar Blómatorgsins á mótum Birkimels og Hringbrautar í Vesturbæ Reykjavíkurborgar, hefur sótt um leyfi til þess að fjarlægja núverandi húsnæði og reisa í staðinn átthyrnda verslun á einni hæð.
Sigurður Guðmundsson, faðir Sigurðar, fékk torgsöluleyfi og byrjaði að selja blóm út um lúgu í fimm fermetra skúr á lóðinni 1949. Fimm árum síðar var húsnæðið stækkað í 30 fermetra, að því er fram kemur í umfjöllun um mál þetta í Morgunblaðinu í dag.
Í sambyggðum skúr var söluturn og undanfarin ár hefur hann verið hluti blómaverslunarinnar, einkum nýttur sem lager. Sigurður yngri byrjaði að vinna með föður sínum 1963, tók við af honum 1990 og hefur rekið verslunina síðan, nú með þremur öðrum starfsmönnum.