Vegum lokað vegna veðurs

Lokað er um Sandskeið, Hellisheiðin, Þrengsli og Kjalarnes, eins er lokað um Mosfellsheiði en fært er um Suðurstrandarveg þar er hálka og skafrenningur, samkvæmt upplýsingum Vegagerðarinnar.

Vaxandi SA-átt og á undan skilum verður hríð og skafrenningur um tíma fyrst suðvestanlands. Á þjóðveginum austur yfir Hellisheiði má gera ráð fyrir skafbyl og litlu skyggni þar til seint í kvöld. Á milli kl. 19 og 22 er reiknað er með vindhviðum allt að 30-35 m/s á utanverðu Kjalarnesi og undir Hafnarfjalli. Víðast hvar hlánar síðar í kvöld og nótt með vatnsveðri upp í 300-400 metra hæð. Vakin er athygli á því að flughált verður þegar leysir og einkum á það við um vegi á vestanverðu landinu.

Lokað er um Sandskeið, Hellisheiði og Þrengsli. Hálka, hálkublettir og éljagangur er víða á Reykjanesinu. Hálka eða snjóþekja er á Suðurlandi. Óveður er undir Eyjafjöllum og lítið ferðaveður.

Hálka eða snjóþekja er á Vesturlandi, éljagangur og víða skafrenningur. Ófært er á Fróðárheiði og þungfært er á milli Arnarstapa og Fróðárheiðar. Hálka og skafrenningur er á Holtavörðuheiði. Óveður er undir Hafnarfjalli.

Hálka, snjóþekja og éljagangur er á flestum leiðum á Vestfjörðum. Snjóþekja og éljagangur er á Þröskuldum.

Á Norður- og Austurlandi er hálka eða hálkublettir. Hálka er með Suðausturströndinni.

• Blogga um frétt