Eðlilegar verðbreytingar í bakaríum

Neytendasamtökin segja að eðlilega hafi verið staðið að verðbreytingum í bakaríum í flestum tilvikum, en samtökin sendu fyrirspurn til 16 bakaría þar sem óskað var eftir upplýsingum á verðbreytingum hjá þeim, m.a. vegna afnáms sykurskattsins um áramót. Þrettán svör bárust.

Samtökin taka fram, að þau verði að treysta á þær upplýsingar sem bárust frá bakaríunum. Þau segja hins vegar að það hefði verið eðlilegra að opinbert eftirlit væri með því hvernig fyrirtæki stæðu að þeim breytingum sem urðu á vörugjaldi og virðisaukaskatti um síðustu áramót, enda um flókna aðgerð að ræða og sem kalli á að eftirlitsaðili hafi aðgang að öllum nauðsynlegum gögnum hjá innflytjendum jafnt og seljendum.

Þetta kemur fram á vef Neytendasamtakanna (NS).

Þrettán svör bárust en þrjú bakarí svöruðu ekki

Þar segir, að NS hafi borist fjölmargar fyrirspurnir frá áramótum vegna breytinga á virðisaukaskatti og afnáms vörugjalda, þar á meðal sykurskattsins svokallaða. Þar sem bakarí noti mikinn sykur í kökur og bakkelsi hafi margar kvartanir beinst að bakaríum.

„Virðisaukaskattur á öllum bakarísvörum hækkaði úr 7 í 11% um áramót. Sætabrauð fellur undir tollskrárnúmerið 1905.9049, kökur og konditorstykki, en þegar sykurskatturinn var lagður á var lagt vörugjald á vörur sem falla undir þennan flokk upp á 21 kr./kg en jafnframt höfðu fyrirtækin heimild til að reikna vörugjaldið (sykurskattinn) út frá raunverulegu sykurinnihaldi,“ segir í tilkynningu á vef NS.

Hér að neðan má sjá þau svör sem bárust frá 13 bakaríum, en tekið er fram að Bakarameistarinn, Sveinsbakarí og Björnsbakarí, sem reki bakarí á Austurströnd, Dalbraut, Fálkagötu, Hringbraut og Miklubraut, hafi ekki svarað erindi NS þrátt fyrir ítrekun samtakanna.

Bernhöftsbakarí
Engar verðbreytingar voru á bakkelsi og tertum um síðustu áramót. Bakaríið segist nota eins lítinn sykur og mögulegt er, það hafi greitt sykurskattinn á hvert kíló og þannig hafi þessar breytingar komið út á sléttu hvað varðar þessar vörur, þ.e. hækkun virðisaukaskatts vóg upp á móti afnámi sykurskatts.

Björnsbakarí Skúlagötu
Þegar sykurskattur var lagður á keypti bakaríið birgðir af sykri og því var verði ekki breytt. Þegar þær sykurbirgðir kláruðust seint í haust var ljóst að þessi skattur yrði lagður af og var því áfram óbreytt verð. Um áramót hækkuðu vörur því aðeins sem nam hækkun virðisaukaskatts.

Bæjarbakarí
Verð var ekki hækkað þegar sykurskatturinn var lagður á. Til stóð að hækka verð vegna breytinga á virðisaukaskatti, en þegar svar barst hinn 14. janúar sl. hafði það ekki verið gert.

Jói Fel
Um áramót voru vörur sem báru sykurskatt lækkaðar í verði sem honum nam (21 kr. á hvert kíló vöru sem er með sykri). Síðan voru allar vörur hækkaðar um 2-4% vegna hækkunar á virðisaukaskatti.

Kornið
Engar verðbreytingar höfðu átt sér stað frá mars 2013. Um áramótin voru hækkanir almennt 3-4% og mestar 6% en einnig voru vöruliðir sem breyttust ekki í verði. Tekið var mið af þróun framleiðslukostnaðar síðustu tvö árin.

Kristjánsbakarí
Um áramótin var verð á vörum sem báru sykurskatt lækkað sem honum nam. Þá hækkaði verð um 4% vegna hækkunar á virðisaukaskatti. Vörur sem báru sykurskatt hækkuðu um ca. 2,5% þar sem sykurskattur vóg um 1,5%.

Kökuhornið
Þegar sykurskatturinn var lagður á var verði ekki breytt og því ekki svigrúm til lækkana nú. Hækkanir vegna breytinga á virðisaukaskatti tóku gildi um áramót.

Kökulist
Þegar svar barst hinn 19. janúar var enn verið að nota sykur sem keyptur hafði verið með sykurskatti. Um áramót var á verð á vörum hækkað um 3%, m.a vegna launaskriðs.

Myllan, tertugallerí
Myllan hækkaði ekki verð þegar sykurskatturinn var lagður á og hefur því verði ekki verið breytt vegna afnáms hans. Verð hækkaði í samræmi við hækkun virðisaukaskatts.

Mosfellsbakarí
Kökur og sætabrauð var lækkað um 21 kr. kílóið, kex og smákökur um 63 kr. kílóið og konfekt um 116 kr. kílóið. Verð hækkaði í samræmi við hækkun virðisaukaskatts.

Okkar bakarí
Í svari dags. 19. janúar kom fram að vöruverði hefði ekki verið breytt vegna þessara breytinga. Bakkelsi og kökur sem báru sykurskatt muni ekki hækka og einhverjar þeirra muni lækka í verði.

Reynir bakari
Í svari dags. 15. janúar kom fram að verði hefði ekki verið breytt á neinum vörum og ekki hafði verið tekin nein ákvörðun um breytingar.

Sandholtsbakarí
Vöruverð hefur hækkað aðeins undanfarið en ekki vegna þessara breytinga þar sem afnám sykurskatts og hækkun virðisaukaskatts jafnar hvort annað út. Verð á ýmsu hráefni, t.d. spelthveiti, súkkulaði, hnetum og fræjum, hafi hins vegar hækkað í verði.

• Blogga um frétt