Vegna vinnu í Múlagöngum í nótt má búast við umferðartöfum þar frá kl. 23 í kvöld þar til kl. 6 í fyrramálið. Þetta kemur fram í tilkynningu frá Vegagerðinni.
Þar segir um færð og aðstæður:
Hálkublettir eru á Hellisheiði og í Þrengslum. Á Suðurlandi er víða nokkur hálka eða hálkublettir.
Á Vesturlandi eru vegir að mestu greiðfærir en eitthvað er um hálkubletti og hálka er á fjallvegum.
Hálka eða snjóþekja er á flestum leiðum á Vestfjörðum. Þæfingsfærð er á Klettshálsi.
Á Norðurlandi er hálka eða hálkublettir og éljagangur austan Eyjafjarðar. Snjóþekja er á Þverárfjalli, Siglufjarðarvegi og til Grenivíkur.
Á Austurlandi er hálka eða hálkublettir.
Suðausturströndin er að mestu greiðfær frá Breiðdalsvík í Suðursveit en hálka eða snjóþekja þar fyrir vestan.
Almannavarnir hafa lokað leiðum á hálendinu norðausturlands, norðan Dyngjufjalla. Vegurinn vestan við Dettifoss er einnig lokaður að hluta.