Ólöf Nordal innanríkisráðherra sagði sig úr bankaráði Seðlabanka Íslands með bréfi dagsettu 8. desember 2014. Þetta kemur fram í yfirlýsingu frá forseta Alþingis.
Í bréfi innanríkisráðherra frá 8. des. sl. segir m.a.:
„Hinn 5. júlí 2013 var ég skipuð í bankaráð Seðlabanka Íslands í samræmi við 26. gr. laga nr. 36/2001.
Vegna skipunnar minnar í embætti innanríkisráðherra segi ég mig hér með úr bankaráði Seðlabanka Íslands.
Í samræmi við ákvæði 26. gr. tekur varamaður sæti mitt þar til Alþingi hefur kosið nýjan aðalmann til loka kjörtímabils bankaráðsins.“
Á fréttavef Hringbrautar í gær var greint frá því að Ólöf væri enn skráð formaður bankaráðs, rúmum þremur mánuðum eftir að hún settist í ráðherrastól.