Glaumbæjarsókn hefur óskað eftir viðræðum við sveitarfélagið Skagafjörð um að gerður verði samningur við kirkjuna þess efnis að hún fái hlutdeild í þeim fjármunum sem ferðamenn skilja eftir í Glaumbæ.
Á síðasta ári komu um 40 þúsund ferðamenn að skoða byggðasafnið, sem rekið er af sveitarfélaginu, kirkjuna og kirkjugarðinn í kring. Á síðasta fundi byggðaráðs var sveitarstjóra falið að finna fundartíma með sóknarpresti og sóknarnefnd Glaumbæjarkirkju.
Séra Gísli Gunnarsson, sóknarprestur í Glaumbæ, sem jafnframt var formaður byggðasafnsnefndar í 15 ár, segir að hér sé um réttlætismál að ræða fyrir kirkjuna og mikilvægt fyrir báða aðila að koma á samningi áður en ráðist verður í fyrirhugaðar endurbætur á safninu og kirkjunni.