Boðað hefur verið til fundar á morgun í kjaradeilu hjúkrunarfræðinga við ríkið. Ríkissáttasemjari boðaði til fundarins og fer hann fram klukkan korter yfir tvö. Ólafur G. Skúlason, formaður Félags íslenskra hjúkrunarfræðinga, segir í samtali við mbl.is að lítið sé um málið að segja að svo stöddu. „En maður vonar bara það besta,“ segir Ólafur.
Í viðtali við mbl.is í gær sagði Ólafur boltann alfarið vera hjá ríkinu og samninganefnd félagsins bíði eftir því að raunhæft tilboð komi á borðið. Hjúkrunarfræðingar hafa verið í ótímabundnu verkfalli í viku.