Lögreglunni á höfuðborgarsvæðinu hafa borist ábendingar í dag eftir að hún auglýsti eftir upplýsingum í tengslum við rannsókn á ráni í verslun Iceland í Arnarbakka í Breiðholti á sunnudag. Ábendingarnar hafa þó ekki skilað neinu sem hægt er að festa hendi á, að sögn Ásgeirs Þórs Ásgeirssonar aðstoðaryfirlögregluþjóns.
Hann segir lögregluna þó vongóða um árangur.
Frétt mbl.is: Þriggja leitað vegna ráns í Iceland
Frétt mbl.is: Ógnuðu starfsmanni með sprautunál
Lögreglan á höfuðborgarsvæðinu leitar þriggja manna í tengslum við rannsókn hennar á ráni í versluninni Iceland í Arnarbakka í Breiðholti á sunnudag. Tilkynning um málið barst lögreglu skömmu fyrir klukkan sex á sunnudagsmorgun, en þrír menn beittu starfsmann verslunarinnar ofbeldi áður en þeir höfðu á brott með sér fjármuni. Ef einhverjir geta veitt upplýsingar um málið, þekkja til mannanna, eða vita hvar þá er að finna, eru hinir sömu vinsamlega beðnir um að hringja í lögregluna í síma 444-1000. Upplýsingum má einnig koma á framfæri á netfangið asmundurg@lrh.is eða í einkaskilaboðum á fésbókarsíðu Lögreglunnar á höfuðborgarsvæðinu.
Posted by Lögreglan á höfuðborgarsvæðinu on Wednesday, 3 June 2015