Ríkisstjórnin bætir við sig 5%

Píratar mælast með 32% fylgi í nýjum Þjóðarpúlsi Gallup og eru sá flokkur sem nýtur mests stuðnings meðal þjóðarinnar. Stuðningur við ríkisstjórnina eykst um fimm prósentustig á milli mánaða.

Píratar tapa tveimur prósentustigum frá síðasta mánuði en stuðningur við ríkisstjórnina hefur aukist úr 31% í 36%, að því er fram kemur á vef RÚV.

Sjálfstæðisflokkurinn er næst stærstur með 24,5% fylgi og bætir við sig tveimur prósentustigum. Framsóknarflokkur nýtur stuðnings 11,3% þjóðarinnar en Samfylkingin mælist með 11,4%.

10,3% segjast styðja Vinstri græna og 6,4% Bjarta framtíð.

Úrtak könnunarinnar var 8.460 manns og þátttökuhlutfallið 57%. Af svarendum tóku 11% ekki afstöðu og rúmlega 10% sögðust myndu skila auðu eða sleppa því að kjósa ef gengið yrði til kosninga í dag.

• 1 blogg um fréttina

Bloggað um fréttina

• Ásgrímur Hartmannsson: Eru það ekki bara skekkjumörk?