Íslenskar stúlkur mega ekki heita Eileithyia. Þær mega hins vegar fá nafnið Eileiþía. Beiðni um báða rithættina barst mannanafnanefnd.
Samkvæmt gögnum Þjóðskrár þá ber engin kona nafnið Eileithyia í þjóðskrá sem uppfyllir skilyrði mannanafnanefndar varðandi hefð. Nafnið kemur ekki fyrir í manntölum frá 1703–1910. Það telst því ekki vera hefð fyrir nafninu Eileithyia. En vegna þess máls hefur mannanafnanefnd ákveðið að úrskurða nafnið Eileiþía á mannanafnaskrá sem eiginnafn.
Á síðasta fundi mannanafnanefndar, 9. júlí, var einnig tekin fyrir beiðni um nafnið Remek. Niðurstaða nefndarinnar var sú að nafnið tekur íslenskri beygingu í eignarfalli, Remeks og telst að öðru leyti uppfylla ákvæði laga um mannanöfn. Nafnið er því samþykkt og fært á mannanafnaskrá.
Þá samþykkti nefndin einnig kvenmannsnafnið Ilse.