Héraðsdómur Reykjaness dæmdi fyrr í vikunni 24 ára gamlan karlmann frá Sómalíu í eins mánaðar fangelsi fyrir að hafa framvísað fölsku vegabréfi í flugstöð Leifs Eiríkssonar mánudaginn 20. júní síðastliðinn. Þá var hann á leiðinni í flug með Icelandair til Toronto.
Maðurinn hefur setið í gæsluvarðhaldi síðan þá og kemur það til frádráttar fangelsisvistinni.
Framvísaði maðurinn sænsku vegabréfi í blekkingarskyni, en hann játaði skýlaust brot sitt.
Með vísan til eðlis brotsins og hliðsjón af almennum varnaðaráhrifum refsinga taldi dómurinn ekki efni til að skilorðsbinda refsinguna.