Ferðamenn góðir fyrir efnahag, slæmir fyrir náttúru

Íslendingar eru almennt jákvæðir gagnvart erlendum ferðamönnum og telja þá hafa góð áhrif á efnahag landsins, atvinnutækifæri, samfélagið og verslun og þjónustu. Flestir telja ferðamennina hins vegar hafa neikvæð áhrif á náttúru landsins, samkvæmt viðhorfskönnun MMR.

Alls töldu 90,9% svarenda könnunarinnar að erlendir ferðamenn hefðu haft jákvæð áhrif á efnahag Íslands, 82,8% á atvinnutækifæri, 71,2% á íslenskt samfélag, 69,7% á sitt bæjarfélag, 67,5% á miðborg Reykjavíkur og 67,1% á fjölbreytni í verslun.

Af þeim sem tóku afstöðu töldu 51,8% að erlendir ferðamenn hafi haft neikvæð áhrif á náttúru Íslands, að því er segir í frétt á vef MMR.

Munur var á viðhorfi til erlendra ferðamanna eftir búsetu. Þannig töldu þeir sem búsettir voru á höfuðborgarsvæðinu frekar að erlendir ferðamenn hefðu haft jákvæð áhrif á miðborg Reykjavíkur (71,2%) en þeir sem bjuggu á landsbyggðinni (61,4%). Hinsvegar voru hlutfallslega fleiri íbúar á landsbyggðinni sem töldu á erlendir ferðamenn hefðu haft jákvæð áhrif á verslun og þjónustu (71,3%) en íbúar á höfuðborgarsvæðinu (64,5%).

Þeir sem tilheyrðu tekjulægsta hópnum (heimilistekjur undir 250 þúsund krónum á mánuði) töldu síður að erlendir ferðamenn hefðu haft jákvæð áhrif á atvinnutækifæri en þeir sem höfðu hærri heimilistekjur. Þannig sögðust 58,7% þeirra sem tilheyrðu tekjulægsta hópnum telja erlenda ferðamenn hafa haft jákvæð áhrif á atvinnutækifæri, borið saman við 92,4% þeirra sem tilheyrðu tekjuhópnum 600-799 þúsund krónur á mánuði.

Hlutfallslega fleiri þeirra sem studdu ríkisstjórnina töldu að erlendir ferðamenn hefðu haft jákvæð áhrif á Íslenskt samfélag (77,4%) en þeirra sem ekki studdu ríkisstjórnina (68,9%).

Þeir sem studdu Framsóknarflokkinn töldu síður að erlendir ferðamenn hefðu haft jákvæð áhrif á efnahag landsins (80,7%) en stuðningsfólk annarra flokka.

Frétt á vef MMR

• 1 blogg um fréttina

Bloggað um fréttina

• Ómar Ragnarsson: Billegt að kenna útlendingum um "hernaðinn gegn landinu."