Fimmtán ára gamall piltur sem leitað var að í gærkvöldi kveikti á spjaldtölvu sinni og lét hana blikka þannig að dauft ljós sást í nætursjónaukum áhafnar þyrlu Landhelgisgæslunnar sem tók þátt í leitinni.
Lenti þyrlan hjá drengnum og sigmaður þyrlunnar fór til hans og var hann heill á húfi. Drengurinn var fluttur um borð í þyrluna sem flaug með hann á Hellu þar sem fjölskylda hans tók á móti honum.
Áhöfn þyrlunnar var kölluð út um hálf níu í gærkvöldi en björgunarsveitir höfðu leitað piltsins síðan um eftirmiðdaginn en hann hafði orðið viðskila við móður sína á Heklu.
Áhöfn þyrlunnar tók með sér GSM leitarbúnað. Var leitað ítarlega í hlíðum fjallsins og um klukkan 22:50 fann svo áhöfn þyrlu Landhelgisgæslunnar drenginn.