Á morgun fer fram fyrirtaka í máli Annþórs Kristjáns Karlssonar og Barkar Birgissonar en þeir eru ákærðir fyrir stórfellda líkamsárás sem leiddi til dauða samfanga þeirra á Litla-Hrauni í maí 2012. Þetta kom fram í fréttum RÚV í gærkvöldi.
Þeir Annþór og Börkur fengu fljótt stöðu grunaðra en á upptöku öryggismyndavélar má sjá þá fara inn í klefa hins látna skömmu áður en hann kenndi sér meins og lést í kjölfarið.
Það tók lögregluna á Suðurlandi tæpt ár að rannsaka mannslátið og var það ekki fyrr en í apríl 2013 sem málið var sent til ríkissaksóknara til meðferðar.
Í tilkynningu sem barst frá lögreglunni eftir málið var sent til ríkissaksóknara kom fram að rannsókn málsins hafi verið flókin og að frá upphafi hafi verið ljóst að ekki yrði að vænta samvinnu þeirra grunuðu.
Við rannsóknina var m.a. dómkvaddur réttarmeinafræðingur til að fara yfir gögn sem urðu til við krufningu líksins og tveir prófessorar í sálfræði til þess að greina atferli fanga á upptökum öryggismyndavéla. Þar að auki var prófessor í verkfræði við Háskóla Íslands fenginn til að rannsaka þá krafta sem þurfti til að valda þeim áverkum sem voru á líkinu. Einnig voru gerðar sérstakar mælingar á hljóðburði innan fangelsisins og möguleikum vitna á að heyra það sem talið er hafa farið fram innan veggja fangaklefa hins látna og nákvæm eftirlíking klefans byggð í fullri stærð í húsnæði Lögregluskóla ríkisins þar sem Tæknideild Lögreglu Höfuðborgarsvæðisins sviðsetti mögulega atburðarás auk þess sem grunuðum var gefinn kostur á að lýsa atvikum í klefanum þar. Það er því óhætt að segja að öllu hafi verið tjaldað til við rannsókn málsins.
Í júní sama ár gaf ríkissaksóknari út ákæru á hendur þeim Annþóri og Berki en í henni er þeim gefið að hafa í sameiningu veist með ofbeldi á fanga á Litla Hrauni og veitt honum högg á kvið með þeim afleiðingum að rof kom á milta og á bláæð frá miltanu sem leiddi til dauða hans skömmu síðar af völdum innvortis blæðinga.
Málið var síðan þingfest í Héraðsdómi Suðurlands þann 11. júní 2013. Athygli vakti að Börkur var fluttur með sjúkrabíl undir læknishendur skömmu eftir að hann mætti til þingfestingarnar. Síðar sama dag sagði verjandi Barkar að hann hafi fengið slæmt brjósklos. Börkur og Annþór tóku báðir þá afstöðu til kærunnar en þeir hafa ávallt neitað sök.
Málið var síðan loks tekið fyrir í október sama ár. Þar gagnrýndu verjendur þeirra Annþórs og Barkar rannsókn málsins harðlega. Verjandi Barkar sagði jafnframt að hugsanlega hafi milta hins látna rofnað við endurlífgunaraðgerðir.
Verjendurnir kröfðust þess að dómkvaddir yrðu yfirmatsmenn til að svara spurningum vegna matsgerðar réttameinafræðingsins og sálfræðinganna sem kallaðir voru til við gerð málsins. Héraðsdómur Suðurlands féllst á þá kröfu í nóvember.
Lítið gerðist í málinu þar til við fyrirtöku 1. apríl. Þá var kveðinn upp úrskurður þess efnis að dómkvaddir verði tveir Þjóðverjar sem verjendur gerðu tillögu um. Þeim var gert að fara yfir skýrslu réttarmeinafræðings í málinu og skila yfirmati. Þá var ákveðið að dómkveða þrjá menn til viðbótar, Norðmann, Svía og Breta, til að fara yfir atferlisskýrslu sálfræðinganna.
En það var ekki fyrr en í febrúar á þessu ári sem það var formlega ákveðið við fyrirtöku málsins að réttarmeinafræðingar frá Svíþjóð og Noregi yrðu yfirmatsmenn í málinu.
Gera má ráð fyrir því að í fyrirtökunni á morgun verði niðurstöður yfirmatsmannanna formlega lagðar fram. Samkvæmt frétt RÚV mun verjandi annars sakborningsins fara fram á að aðalmeðferð verði ákveðin í málinu.
Á meðan bíða Annþór og Börkur á Litla Hrauni en þar afplána þeir dóm fyrir annað brot. Í samtali við mbl.is í júní sagði verjandi Annþórs það miður hversu lengi skjólstæðingur hans hafi þurft að býða eftir yfirmatsskýrslunni.
„Þetta er ofboðslega þreytandi. Ég er búinn að vera með Annþór í þessu máli frá upphafi, eða frá árinu 2012. Það er því vissulega leiðinlegt þegar mánuðir og ár líða án þess að nokkuð gerist í málinu,“ sagði Hólmgeir Elías Flosason, verjandi Annþórs í samtali við mbl.is. Hann sagði jafnframt að þetta ólokna mál kæmi í veg fyrir ýmis fríðindi innan veggja fangelsisins.