Nauðsynlegt er að bregðast við gríðarmikilli gróðureyðingu, sandfoki og svifryksmengun í Skaftárhreppi, að mati Sveins Runólfssonar landgræðslustjóra.
Nýafstaðið Skaftárhlaup olli mjög miklu tjóni á grónu landi. Hlaupið flæmdist yfir um 3.000 hektara (30 km2) í byggð og líklega stærra svæði á afréttunum, að því er fram kemur í umfjöllun um mál þett aí Morgunblaðinu í dag.
„Mesta sandfok, jarðvegs- og gróðureyðing í byggð á Íslandi er í Skaftárhreppi,“ sagði Sveinn. „Við óttumst að mikið jarðvegsrof í Eldhrauni haldi áfram. Það er oft þurrkatíð á veturna í Skaftárhreppi. Iðulega er þar mjög mikið sand- og aurfok sem leggst yfir byggðirnar í nágrenni Eldhrauns.“